திருகோணமலை,மொரவெவ- தரியாய சந்தியிலிருந்து உப்புவெலி நொரக்காடு சந்திவரையான பகுதிக்கு இடையில் உதவி கேட்ட பெண்களை வாகனத்தில் கடத்திச் சென்ற இருவர் கைது!

Sunday, October 23, 2011
திருகோணமலை - மொரவெவ - திரியாய சந்தியிலிருந்து உப்புவெலி - நொரக்காடு சந்திவரையான பகுதிக்கு இடையில் இரு பெண்கள் கெப் வாகனத்தில் கடத்திச் செல்லப்பட்டுள்ளனர்.

இந்த கடத்தல் சம்பவம் இன்று அதிகாலை 2 மணியளவில் இடம்பெற்றுள்ளது.

இந்த சம்பவத்தை அறிந்த மொரவெவ பொலிஸார் கெப் வாகனத்தை தடுத்து நிறுத்தி குறித்த இரு பெண்களையும் மீட்டுள்ளனர்.

கெப் வாகனத்தில் இருந்த இரு சந்தேகநபர்களையும் பொலிஸார் கைது செய்துள்ளனர்.

மொரவெவ நாமல்வத்தை பகுதியில் கெப் வாகனம் சென்றுக் கொண்டிருந்த போது அதிலிருந்த பெண் கூக்குரலிட்டு கத்தியுள்ளார்.

இதனையடுத்து மொரவெவ பொலிஸாருக்கு குற்றச் செயல் ஒன்று நடப்பதாக அறிவிக்கப்பட்டது.

உடனடியாக செயற்பட்ட பொலிஸார் கெப் வாகனத்தை மடக்கிப் பிடித்து இரு பெண்களையும் காப்பாற்றியுள்ளனர்.

வீடு செல்ல போக்குவரத்து வசதியில்லாது வீதியில் நின்று கொண்டிருந்த இரு பெண்கள் புத்தளத்தில் இருந்து திருகோணமலை நோக்கிச் சென்ற கெப் வாகனத்தில் இன்று அதிகாலை 1.20 அளவில் ஹொரவபத்தானை பகுதியில் வைத்து ஏறி கோமரங்கடவல செல்ல திரியாய சந்தியில் தம்மை இறக்கிவிடுமாறு கெப் வாகன சாரதியிடம் கோரியுள்ளனர்.

இதனை அடுத்து அவர்களுக்கு உதவி செய்வது போல் அழைத்துச் சென்ற சாரதி திரியாய சந்தியில் கெப் வாகனத்தை நிறுத்தாது அவர்களை கடத்திச் சென்றுள்ளார்.

இந்த சம்பவத்துடன் கைது செய்யப்பட்ட இருவரும் புத்தளம் பகுதியைச் சேர்ந்தவர்களாவர்.

சந்தேகநபர்களை புத்தளம் நீதவான் முன்னிலையில் ஆஜர்படுத்த நடவடிக்கை எடுத்துள்ள மொரவெவ பொலிஸார் மேலதிக விசாரணைகளை ஆரம்பித்துள்ளனர்