தமிழ் தேசிய கூட்டமைப்பு சர்வதேசத்துடன் கைகோர்ப்பது கூட்டமைப்புக்கே அழிவை ஏற்படுத்தும்: சம்பிக்க ரணவக்க!

Wednesday, September 10, 2014      
இலங்கை::அரசாங்கத்தைப் பலவீனப்படுத்த தமிழ் தேசிய கூட்டமைப்பு சர்வதேசத்துடன் கைகோர்ப்பது கூட்டமைப்புக்கே அழிவை ஏற்படுத்தும் என்று அமைச்சர் சம்பிக்க ரணவக்க தெரிவித்துள்ளார்.

 

தமிழ் மக்களுக்கு அரசியல் தீர்வை வழங்க அரசாங்கம் முன்வராவிட்டால் அஹிம்சை வழியில் போராட்டம் நடத்தப் போவதாக, தமிழரசு கட்சியின் தலைவர் மாவை சேனாதிராஜா கட்சி மாநாட்டில் நிகழ்த்திய உரை தொடர்பில் கருத்துக் கூறும்போதே, அமைச்சர் சம்பிக்க ரணவக்க இவ்வாறு தெரிவித்தார். அவர் மேலும் தெரிவிக்கையில்,
 

வடகிழக்கை இணைத்து புலிகளின் தனித் தமிழீழத்தை உருவாக்க இந்தியா துணைபோனாலும் இவர்களையும் தடுத்து நாங்கள் போராடத் தயாராகவும் இருக்கின்றோம். கூட்டமைப்பின் அஹிம்சை வழி போராட்டம் ஆயுத போராட்டமாகவும் மாறலாம்.  புலிகள் வெற்றி பெற்றிருந்தால் இன்று தமிழ்த் தேசியக் கூட்டமைப்பு  புலிகளின் ஆதரவு கட்சிகளாகவே செயல்பட்டிருக்கும். தமிழ் மக்களின் உண்மையான பிரச்சினைகளை அவர்கள் கவனத்தில் கொள்ளாது புலிகளின் செயல்களை நியாயப்படுத்துவதையே தற்போது செய்து வருகின்றது.

 

தமிழர் பிரச்சினைகளை இலங்கை அரசுடன் பேசி தீர்க்க வேண்டும் அதை புரிந்து கொள்ளாது. சர்வதேசத்துடன் கைகோர்த்து இந்த அரசை பலவீனப்படுத்த நினைத்தால் அது தமிழ்த் தேசிய கூட்டமைப்பிற்கு அழிவையே தேடி தரும். இவர்கள் கூறுவது அஹிம்சை போராட்டம் அல்ல ஆயுத போராட்ட கொள்கையை மனதில் வைத்து பேசுகின்றார்கள் என்று அவர் தெரிவித்தார்.