காலி மீன்பிடித் துறைமுகத்திலிருந்து கடலுக்குச் சென்று நிர்க்கதியான மீனவர்களும் அவர்கள் பயணித்த படகும் கண்டுபிடிக்கப்பட்டுள்ளது!

Friday, December 02, 2011
காலி மீன்பிடித் துறைமுகத்திலிருந்து கடலுக்குச் சென்று நிர்க்கதியான ஐந்து மீனவர்களும் அவர்கள் பயணித்த படகும் கண்டுபிடிக்கப்பட்டதாக கடற்தொழில் திணைக்களம் அறிவித்துள்ளது.

இந்தப் படகு கடந்த செப்டம்பர் மாதம் 19 ஆம் திகதி மீன்பிடி நடவடிக்கைகளுக்காக கடலுக்குச் சென்றிருந்தது.

எவ்வாறாயினும் இந்தப் படகுடனான அனைத்துத் தொடர்புகளும் செப்டம்பர் மாதம் 22 ஆம் திகதியுடன் துண்டிக்கப்பட்டதாக கடற்தொழில் திணைக்களத்தின் உதவிப் பணிப்பாளர் லால் டி சில்வா கூறியுள்ளார்.

இது தொடர்பாக கிடைத்த தகவலுக்கமைய விசாரணைகள் ஆரம்பிக்கப்பட்டிருந்ததாக அவர் சுட்டிக்காட்டியுள்ளார்.

காணாமற்போயிருந்த படகை வடபகுதி கடற்பரப்பில் மேலும் ஒரு படகில் இருந்த மீனவர்கள் நேற்றிரவு கண்டுள்ளதாக தெரிவிக்கப்படுகின்றது.

இதற்கமைய அந்தப் படகை காங்கேசன்துறையிலுள்ள மீன்பிடித் துறைமுகத்திற்கு கொண்டு வருவதற்கான ஏற்பாடுகளை கடற்தொழில் திணைக்களம் மேற்கொண்டு வருகின்றது.