ஐக்கிய மக்கள் சுதந்திர முன்னணியின் சார்பில் பாராளுமன்றத்தை பிரதிநிந்தித்துவப்படுத்தும் மஹிந்த ஆதரவு அணியினர் எதிர்வரும் பாராளுமன்ற அமர்வின்போது சுயாதீனமாக செயற்படப்போவதாக தெரிவித்துள்ளனர். ஜனாதிபதி மைத்திரிபால சிறிசேன கட்சியின் தலைவராக இருக்கும் வரையில் எந்தச் சந்தர்ப்பத்திலும் ஐக்கிய மக்கள் சுதந்திர முன்னணியுடன் இணைந்து செயற்படப் போவதில்லை எனவும் அவர்கள் சுட்டிக்காட்டியுள்ளனர்.
ஐக்கிய மக்கள் சுதந்திர முன்னணியினர் புதிய அரசாங்கத்தில் தம்மையும் ஆளும் கட்சியில் இணைத் துக்கொண்டுள்ளதால் பாராளுமன்றத்தில் ஐக்கிய தேசியக் கட்சி மற்றும் ஐக்கிய மக்கள் சுதந்திர முன்னணி ஆகிய பிரதான இரண்டு கட்சிகளும் ஆளும் கட்சியாகவே செயற்படுகின்றன. எனினும் ஐக்கிய மக்கள் சுதந்திர முன்னணியின் சார்பில் மஹிந்த ஆதரவு அணியாக செயற்படும் அணியினர் தாம் அரசாங்கத்துடன் இணைந்து செயற்பட விரும்பாத நிலையில் தம்மை எதிர்க்கட்சியாக செயற்பட அனுமதிக்கக் கோரியிருந்தனர். இந்நிலையில் இப்போது மஹிந்த ஆதரவு அணியினர் தாம் எதிர்வரும் பாரா ளுமன்ற அமர்வின் போது பாராளுமன்றத்தில் சுயாதீனமாக செயற்படவுள்ளதாக தெரிவித்துள்ளனர்.
எதிர்வரும் 22ஆம் திகதி பாராளுமன்றம் கூடவுள்ள நிலையில் அந்த அமர்வில் தாம் பாராளுமன் றில் தனித்து செயற்படவுள்ளதாகவும், எந்தவொரு கட்சிக்கும் ஆதரவு வழங்கப்போவதில்லை எனவும் தெரிவித்துள்ளனர். இது தொடர்பில் பாராளுமன்ற உறுப்பினர் உதய கம்மன்பில தெரிவிக்கையில்,
ஐக்கிய மக்கள் சுதந்திர முன்னணியின் சார்பில் நாம் கடந்த பாராளுமன்றத் தேர்தலில் போட்டியிட்டாலும் எம்மால் எந்தவொரு சந்தர்ப்பத்திலும் இந்த அரசாங்கத்துடன் இணைந்து செயற்பட முடியாது. கட்சியின் கொள்கைக்கும், மக்களுக்கு கொடுத்த வாக்குறுதிக்கும் முரணான வகையில் இப்போது ஐக்கிய மக்கள் சுதந்திர முன்னணியின் பிரதான உறுப்பினர்கள் செயற்பட்டு வருகின்றனர். ஆகவே இதை ஒருபோதும் எம்மால் ஏற்றுக்கொள்ள முடியாது.
அதேபோல் கடந்த இரண்டு தேர்தல்களின் போதும் ஐக்கிய மக்கள் சுதந்திர முன்னணியின் வெற்றியை தடுத்த ஜனாதிபதி மைத்திரிபால சிறிசேனவை எம்மால் ஒருபோதும் தலைவராக ஏற்றுக்கொள்ள முடியாது. ஆகவே ஜனாதிபதி மைத்திரிபால சிறிசேன கட்சியின் தலைவராக இருக்கும் வரையில் எந்தவொரு சந்தர்ப்பத்திலும் நாம் ஐக்கிய மக்கள் சுதந்திர முன்னணியுடன் இணைந்து செயற்பட மாட்டோம்.
அதேபோல் எதிர்வரும் மாகாணசபைத் தேர்தலின் போது ஐக்கிய மக்கள் சுதந்திர முன்னணியில் உள்ள முக்கிய ஆறு கட்சிகள் ஒன்றிணைந்து தனித்து களமிறங்க தீர்மானம் எடுத்துள்ளோம். அதற்கான பேச்சுவார்த்தைகளை நாம் ஆரம்பித்துள்ளோம். எனினும் யார் எமது கூட்டணி என்பதை இப்போது வெளியிட முடியாது. எமது கட்சியின் நலனுக்காகவும் நாட்டை பாதுகாக்கவும் இரகசியமாக செயற்படவேண்டிய தேவை ஏற்பட்டுள்ளது. நாம் வெளிப்படையாக ஏதேனும் முடிவுகளை எடுக்கும் பட்சத்தில் எமது முயற்சிகளை முறியடிக்க பலர் செயற்பட்டு வருகின்றனர் எனவும் அவர் குறிப்பிட்டார்.
No comments:
Post a Comment