பஞ்சாப் மாநிலத்தில் தீவிரவாதிகள் தாக்குதல் : 2 போலீசார் உள்பட 9 பேர் பலி!

Monday, July 27, 2015

சண்டிகர்:பஞ்சாப் மாநிலத்தில் இரண்டு இடங்களில் தீவிராதிகள் நடத்திய திடீர் தாக்குதலில், 2 போலீசார் 7 பொதுமக்கள் என 9 பேர் பலியாகியுள்ளனர். பலர் படுகாயம் அடைந்துள்ளனர்.

பஞ்சாப் மாநிலம் குர்தாஸ்பூரில் ராணுவ உடை அணிந்து வந்த 4 பயங்கரவாதிகள் பேருந்து மற்றும் காவல் நிலையங்கள் என 2 இடங்களில் அதிரடியாக ஒரே நேரத்தில் தாக்குதல் நடத்தினர்.

இதில் போலீஸ் காவலர் ஒருவர் கொல்லப்பட்டுள்ளார். பொது மக்கள் 7 பேரும், போலீசார் 3 பேரும் படுகாயம் அடைந்துள்ளனர். பயங்கரவாதிகள் தினாநகர் காவல் நிலையத்தினையும் குறிவைத்து தாக்குதல் நடத்தினார்கள். மேலும்  ரயில் நிலையத்தில் வைக்கப்பட்ட வெடிகுண்டுகள் கண்டுபிடிக்கப்பட்டு, அகற்றப்பட்டுள்ளன.

இதனால் ஜம்மு-அமிர்தசரஸ் இடையேயான ரயில் போக்குவரத்து நிறுத்தி வைக்கப்பட்டுள்ளது. காவல் நிலையம் மீது தாக்குதல் நடத்திய பயங்கரவாதிகளை எதிர்த்து போலீசாரும் பதில் தாக்குதல் நடத்தி வருகின்றனர். அப்பகுதியில் தொடர்ந்து துப்பாக்கிச் சூடு தாக்குதல் நடைபெறுவதால் அங்கு பதற்றம் நிலவுகிறது.