பயங்கரவாத தடைச் சட்டத்தின் புதிய விதிமுறைகள் இன்று முதல் நடைமுறை!

Thursday,September,01,2011
பயங்கரவாத தடைச் சட்டத்தின் 27 அவது பிரிவின் கீழ் புதிய விதிமுறைகள் சிலவற்றை இன்று முதல் நடைமுறைப்படுத்துவதற்கு அரசாங்கம் நடவடிக்கை எடுத்துள்ளது.

அவசரகால சட்டம் நீக்கப்பட்டதுடன் பாதுகாப்பு அமைச்சராக ஜனாதிபதிக்கு வழங்கப்பட்டுள்ள அதிகாரத்திற்கு அமைய இந்த விதிமுறைகள் ஏற்படுத்தப்பட்டுள்ளதாக சட்டமா அதிபர் மொஹான் பீரீஸ் நியூஸ் பெஸ்ட்டுக்கு குறிப்பிட்டார்.

நான்கு பிரதான விடயங்கள் தொடர்பில் இந்த விதிமுறைகள் அமுல்படுத்தப்பட்டுள்ளதாக சட்ட மா அதிபர் சுட்டிக்காட்டினார்.

இதற்கமைய தற்போது தடுத்து வைக்கப்பட்டுள்ள தமிழீழ விடுதலைப் புலிகள் அமைப்பின் உறுப்பினர்கள் தொடர்பில் நடவடிக்கைகளை மேற்கொள்வதற்கு இந்த விதிமுறைகளின் ஊடாக சந்தர்ப்பம் கிடைக்கவுள்ளது.

இதனைத்தவிர தமிழ விடுதலைப் புலிகள் அமைப்பு தடைசெய்யப்பட்ட அமைப்பாக பிரகடனம் செயய்ப்பட்டமை மற்றும் தமிழர் புனர்வாழ்வு கழகத்தை தடைசெய்வதற்கான தீர்மானம் என்பன தொடர்ந்தும் அமுலில் இருக்கும் என சட்டமா அதிபர் மொஹான் பீரீஸ் குறிப்பிட்டார்.

தமிழீழ விடுதலைப் புலிகள் அமைப்பின் முன்னாள் உறுப்பினர்களுக்கான புனர்வாழ்வு திட்டங்களை இன்று அமுல்படுத்தப்பட்டுள்ள விதிமுறைகள் மூலம் எவ்வித பாதிப்புக்களும் இன்றி முன்னெடுக்க முடியுமெனத் தெரிவிக்கப்படுகின்றது.

இந்த விதிமுறைகள் அடங்கிய விசேட வர்த்தமானி தற்போது அச்சிடப்பட்டு வருவதாகவும் சட்டமா அதிபர் மேலும் சுட்டிக்காட்டினார்.